Regentis tragedie ending with ane exhortatoun
|
JAmes Erle of Murray Regent of Renoun,
|
Now lyis deid and dulefullie put doun,
|
Murdreist but mercy, murnand for remeid,
|
Quha lost his lyfe in Lythquo with ane loun,
|
Giltles God wait betraist in to that toun,
|
Slane with ane schot and saikles put to deid:
|
Feit be our fais, throw fellonie and feid:
|
Hangman to Hary, now Burrio to hir brother:
|
Weill may this murther manifest the tother.
|
Quhat leid on lyfe wald nocht lament his lose?
|
Wais me to want him, is the commoun voce,
|
For sic ane Prince sall never pure man haif,
|
Tint be ane Tratour, steilling up ane close,
|
Possest in purpois, lyfe for lyfe to cose,
|
Bot na compair, ane Kings Sone to ane knaif,
|
Sen he is gone agane my will to graif,
|
Throw all this Realme I dar weill mak this ruse,
|
Rang nocht his maik sen buryir was the Bruse.
|
To keip gude reule, he raid and tuke na rest,
|
Baith South and North, and sumtyme eist & west,
|
All to decoir our commoun weill ye knaw,
|
Be quhome lat se wes Pirats sa opprest?
|
Or yit the theiffis sa dautonis, dung, and drest?
|
Argyle and Huntlie hid thame baith for aw,
|
And quhen he mycht, he myst nocht in the Law
|
Twyse on the day, and sleipit nocht in sleuth,
|
To se na buddis suld beir thame by the treuth.
|
Of this foule fact suppois our fais be fane,
|
Yit efter Moyses, Josua come agane,
|
To gyde the pepill, gevand the gloir to God:
|
Suld thay succeid that hes him saikles slane?
|
Be war with that, I wald ye war not vane,
|
To haif your waik anis wirryit with the tod,
|
Think ye with ressoun thay suld reule the rod,
|
With double murther maid us all ado?
|
And with our King wald play Cowsauly to?
|
Pray gif ye pleis, I warne yow ye haif neid,
|
To keip our King fra cankrit Kedyochis seid,
|
That daylie wayis Inventis to put him doun,
|
His Grandschir slane at Lythquo gif I leid:
|
His Gudschir thryse hes left this land in deid,
|
Hary at midnycht murdreist in this toun:
|
His Cousing last, and yit thay clame the Crown,
|
Blynd Jok may ges, gif thir be godly deidis,
|
Brunt be yone Bischop in quhome this barret breidis.
|
Cut of that Papist Prothogall of partis,
|
That with his lesingis all the laif pervertes,
|
Syne Joyne your forces to the feildis but feir,
|
Because ye tak your stoutnes all in startis:
|
To Hammiltoun in haist quhill ye haif hartis,
|
Devyse sum way to pay your men of weir,
|
Fra he be gane ye neid nocht gather geir:
|
Fecht weill, and war thame, and wyn the ryches thair
|
And gif ye de, in deid ye neid na mair.
|
Curst be ye baith, bischop and bothwell hauch,
|
For this foule deid, your seid man rak ane sauch,
|
Gif ye twa want the widdie, now thay wrang yow:
|
Lythquo lament, your burges may luke bauch,
|
In beir seid tyme your burrow rudis ly fauch,
|
Cause of this murther laitly maid amang yow,
|
Or gif I trowit it helpit ocht to hang yow,
|
Sa suld ye die: and syne your towne in fyre,
|
Sum part for sythment to asswage our Ire.
|
Over thir twa housis, for thair deids inding,
|
The hand of God dois over thair heidis hing
|
Thame to distroy, I dout not in our dayis,
|
Hepburnis will wraik, for wyrrying of the King,
|
Bot Hammiltounis fy, this was ane foular thing:
|
Is this your ferme Religioun? yais? yais?
|
Sic tyme sall cum I trow as Thomas sayis:
|
Hirdm[e]n sall hunt yow up throw Garranis gyll
|
Castand thair Patlis and lat the pleuch stand still.
|
Apperandly thir plaigis ar powrit out,
|
To wraik this warld, and wait ye quhair about?
|
Because we want na vice under the hevin:
|
Sen double murther markis to reule the rout,
|
With Niniveitis lat us ga cry and schout,
|
For to retreit yone sentence Justly gevin,
|
Yit thow gude Lord that Judgis all thingis evin,
|
Seand the perrell that over the pepill standis,
|
Lat nocht thair blude be socht at saikles handis.
|
Now Lordis and Lairdis assemblit in this place,
|
Over lang we talk of Tragedeis allace,
|
Away with cair, with confort now conclude:
|
As gude in paper as speik it in your face,
|
Gif murtherars for geir get ony grace,
|
Ye will be schent, think on I say for gude
|
Sen art and part, ar gyltie of his blude:
|
Quhy suld ye feir, or favour thame for fleiching?
|
Ye hard yourself, quhat Knox spak at the preiching.
|
First on the feildis mak schortly to lat se,
|
We want bot ane, and quhat the war ar we?
|
Sen God wes pleist to pas him out of pyne,
|
All men on mold ar markit for to de,
|
With tyme and place appointit, sa wes he:
|
Lat nocht in cair your curages declyne,
|
For want of ane I wald nocht all suld tyne,
|
Gar reid at Roxburgh quhen the King wes slane,
|
And yit ane woman wan the hous agane.
|
Sen than be wemen douchtie deidis wer done,
|
Barronis be blyith, and hald your hartis abone,
|
And lat us heir quhairfoir ye hapnit hidder:
|
Thay ar na partie, and ye speid yow sone,
|
Albeit that boyd be daylie in Denone,
|
Lang or Argyle be gadderit in togidder,
|
Quhen all is done, the counsall may considder,
|
Quhat is the maist yone murtheraris may do,
|
Suppois that Huntlie wald cum help thame to.
|
Had we ane heid wald stoutly undertakit,
|
The Barronis sayis thay suld be bauldly bakit.
|
Mycht thay for tyritnes travell of thir tounis:
|
Quhy stand ye aw of Tratouriris twyse detractit?
|
Think ye not schame to heir your Lordschipis lakit?
|
Sum feiris thair flesche, sum grevis to gadder cronuis
|
Sum happis thair heids, sum belttis thame up in gounis
|
Luke gif your partie prydis thame in thair spurring,
|
Reipand the feildis and fryis not in thair furring.
|
Wa worth the wyfis that fostred yow and fed,
|
Ye dow not ly unles ye haif ane bed,
|
Keip yow fra cauld, haif claith within your scho:
|
I think greit ferly how ye can be red,
|
Or fray at thame, that last befoir yow fled,
|
Wantand thair Quene, syne God agane thame to,
|
Quhy ly ye heir with lytill thing ado?
|
The Barronis biddis yow schortly byde or gang,
|
Curage decayis fra Scottis men tarie lang
|
Have Lyounis lukis, and than mak me ane lear,
|
Be Hanniballis, and heis your hartis sum hear,
|
Bot keip not capua quhil yone Knaifis incluse yow,
|
He neidis not work, that hes ane gude oversear,
|
Nane neid ye ferch, swa that your hartis war frear,
|
Bot be my saule my self culd never ruse yow:
|
I knaw weill for this cryme, Christ sall accuse yow,
|
For spairing Agag, Saull wes puneist sair:
|
Swa sall he yow, I dar nocht say na mair.
|
The Lord of Hostes that hevin & eirth commandis,
|
To keip our King from all unhappy handis,
|
The Quene of Ingland and hir Counsall to:
|
Ye feir the Frenchemen suld overlay thir landis,
|
Bot I heir say be sum that understandis,
|
The Doctouris doutis bot thay haif mair ado:
|
Our Quene is keipit straitly, thair standis scho:
|
Ingland will help yow, and ye help your sellis,
|
And be the contrair craif thame na thing ellis.
|
This fair ye weill, I flait not to offend yow,
|
In sempill veirs this Schedull that I send yow
|
Beseikand yow to schort it gif ye may,
|
Steill ye away, the wyfis will vilipend yow
|
And gif ye byde the burrowis will commend yow,
|
Best wer I think mycht we prevene yone day
|
Thair Semblis beis on Sonday I heir say,
|
In Glasgow towne thinkand to fecht or fle:
|
It lukis weill, thair, ye get na mair of me.
|
AS men recordis, in deid my Lordis,
|
I schrink not for to schaw:
|
Suppois ye crak, ye ly abak,
|
And lybellis be the Law.
|
Ye mak not to, as men suld do,
|
I trow ye stand sum aw:
|
Suppois ye hecht, to se yow fecht,
|
That day will never daw.
|
Is na remeid, fra he be deid,
|
Na man to seik ane mendis?
|
Or quha is heir, dar brek ane speir,
|
Upon yone lymmeris lendis?
|
Ye dar not mum, quhill Saidlar cum,
|
To se quhat Ingland sendis:
|
Thinkand to say it, and ay delay it,
|
And swa the mater endis.
|
With sychis and sobbis, and beltit robbis,
|
Ye counterfite the dule:
|
Quhat douchtie deidis, to weir sic weidis,
|
Except it wer ane fule.
|
Mak of the towne, and cow thame downe,
|
Now or your curage cule,
|
For Maddie sayis, byde ye aucht dayis,
|
Ye be not thair quhill Yule.
|
Is this the thing, quha gydis the King.
|
Ye can not all aggre:
|
Now fy for schame, feche Levenox hame,
|
Ye haif nane narer nor he.
|
Gif he want grace to gyde that place,
|
Cheis outher twa or thre:
|
Than war I fane, bot all in vane,
|
To wis and will not be.
|
And sum thair bene, waittis on the Quene,
|
Bot gaip ay quhill thay get hir:
|
And war scho heir, I tak na feir,
|
The Feynd aby we set hir.
|
For we ar now, als stark I trow,
|
As farnyer quhen we met hir:
|
Quhen all is done, thay start over sone,
|
To boist and not the better.
|
I think it best, ye tak na rest,
|
Gif ye durst under tak it:
|
And we be trew, we ar anew,
|
Ye sal be bauldly bakit.
|
Bot sen I se it will not be,
|
That meter will not mak it:
|
The Feynd mak cair, I say na mair,
|
I rew that ever I spak it.
|
|
|
|
|
|